Эришилган натижалар

Ўзбекистон Республикаси Президентининг 2022 йил 21 декабрдаги “Янги Ўзбекистон маъмурий ислоҳотларини амалга ошириш чора-тадбирлари тўғрисида”ги 269-сон Фармонига асосан Экология, атроф-муҳитни муҳофаза қилиш ва иқлим ўзгариши вазирлиги ҳузурида Ўрмон хўжалиги агентлиги ташкил этилди.

Республикада ўрмон фонди ерларининг умумий ер майдони 11,8 млн гектарни, Ўзбекистон Республикаси умумий ер майдонининг 26 фоизини ташкил қилади, ўрмон билан қопланган ер майдонлари эса 3,4 млн гектарни, Ўзбекистон Республикаси умумий ер майдонининг 7,7 фоизини ташкил этади.

Ўрмон фонди ерларининг 82 фоизи чўл, 14 фоизи тоғ, 4 фоизи тўқай ҳудудидан иборат.

2023 йил биринчи ярмида Ўрмон хўжалиги агентлиги тизимида:

Республикада экологик вазиятни барқарорлаштириш мақсадида 200 минг гектар майдонда ўрмон барпо қилиш ва қайта тиклаш тадбирлари амалга оширилди.

Орол денгизининг қуриган туби ва Оролбўйи ҳудудларида қум кўчиши ҳамда атмосфера ҳавосига туз–чанг кўтарилишини бартараф этиш мақсадида Мўйноқ туманида 128 минг гектар, Бухоро вилоятида 40 минг гектар, Навоий вилоятида 17 минг гектар ва Хоразм вилоятида 10 минг гектар майдонда саксовул ва бошқа чўл ўсимликларидан “яшил қопламалар” барпо этилди.

Ўрмон хўжаликлари томонидан дарахт ва буталарнинг 940 тонна уруғлари жамғарилди.

545 гектар майдонда тупроқ-иқлим шароитга мос манзарали, мевали дарахт ва буталарнинг ниҳолхона ва кўчатхоналари ташкил этилди.

“Яшил макон” умуммиллий лойиҳаси доирасида жорий йил баҳор мавсумида 22 млн. дона иқлим шароитига мос манзарали, мевали дарахт ва буталарнинг кўчат ва қаламчалари етказиб берилди.

Суғориладиган қишлоқ хўжалиги ерлари дала четларида 2 минг гектар майдонда иҳота дарахтзорлари ташкил этилди.

Нукус шаҳри атрофида 5 км, Урганч шаҳри ва Урганч–Гурлан автомобиль йўли атрофида 5 км масофада катальпа, қайроғоч, япон сафораси каби дарахтлар кўчатлари экилиб, “яшил белбоғлар” барпо этилди.

Ўрмонларни муҳофаза қилиш ва сақлаш мақсадида тизим ташкилотлари томонидан 40 минг гектар майдонда ўрмон касаллик ва зараркунандаларига қарши ўрганиш ишлари олиб борилди.

Ўрмон ёнғинларини олдини ишларини мувофиқлаштириш мақсадида агентлик ва тизим ташкилотларида ёнғин келиб чиқиш хавфи юқори бўлган ёз мавсумида узлуксиз навбатчилик ташкил этилди.

Ўрмон ҳудудларида яшовчи аҳоли ва ўрмонга ташриф буюрувчилар учун ўрмондан тўғри фойдаланиш, ўрмон ёнғинларини содир этилишини олдини олиш мақсадида 2000 га яқин огоҳлантирувчи баннерлар жойлаштирилди.

Ўрмон фондидаги 3,5 минг гектар фойдаланилмаётган ер майдони ўзлаштирилди.

5 минг гектар майдонда доривор ва озуқабоп ўсимликлар плантацияси ташкил этилиб, 2 минг тонна хомашё етиштирилди.