Маълумки, қурғоқчилик – буғланиш ёғиндан ортиқ бўлган шароитларда кечадиган узоқ давомли об-ҳаво бўлиб, бундай шароитда тупроқдаги сув захираси тез сарфланиб кетади. Бу каби ҳолатлар экинлар ҳамда яйлов ўсимликларининг ривожланиши ва маҳсулдорлигига салбий таъсир кўрсатади
Ер майдонларида қурғоқчилик ва чўлланиш муаммоларини ҳал қилишда барча учун мақбул ечимни излаш, ўзаро келишилган ёндашувлар талаб этилади.
Мамлакатимизда чўлланишнинг олдини олиш, ўрмонларни қайта тиклаш ва иҳота ўрмонларини кўпайтириш бўйича чора-тадбирлар амалга оширилмоқда. Таъкидлаш жоизки, республикада сув ресурслари камайиб бораётгани бир пайтда қурғоқчиликни олдини олиш мақсадида ҳамда “Яшил макон” дастури доирасида яшил ҳудудларни ташкил қилиш, пахта ва полиз экинларни ҳосилдорлигини ошириш учун сувни тежовчи технологияларни лойиҳалаш ва жорий этиш хизматига талаб йилдан-йилга ошиб бормоқда.
Олимларнинг таъкидлашича, яқин 25−30 йил ичида иқлим янада иссиқлашади ва об-ҳаво шароити кескинлашади. Кўплаб заиф яшаш жойлари аллақачон йўқ бўлиб кета бошлади. Атмосферага иссиқхона газлари чиқиндилари назоратсиз равишда тарқалишда давом этса, олимлар бунинг узоқ муддатли жиддий оқибатларга олиб келишидан қўрқишмоқда. Булар, дунё тартибининг бузилиши, кенг кўламли миграция, ер тарихидаги ўсимликлар ва ҳайвонларнинг олтинчи оммавий йўқ бўлиб кетишининг тезлашиши, музликлар эриши, денгиз сатҳининг кўтарилиши ва дунёнинг қирғоқбўйи шаҳарларининг кўп қисмини сув босиши каби оқибатлардир.
Қайд этиш лозимки, тегишли қонунчиликка кўра, Ўзбекистоннинг чўлланиш ва қурғоқчиликка қарши курашиш бўйича халқаро мажбуриятларини бажариш, чўлланиш ва қурғоқчиликка қарши курашиш бўйича халқаро ва минтақавий ташкилотлар билан ҳамкорлик қилиш, республикада чўлланиш ва қурғоқчиликка қарши курашиш бўйича дастур ва лойиҳаларни ишлаб чиқиш ва амалга оширишда иштирок этадиган ташкилотлар ишларини мувофиқлаштириш ҳамда қаттиқ қурғоқчиликни бошдан кечираётган ва (ёки) чўлга айланиб бораётган мамлакатларда, айниқса Африкада чўлга айланиб боришларга қарши кураш бўйича БМТ Конвенцияси талабларини бажаришда Ўзбекистоннинг миллий ваколатли органи вазифасини амалга ошириш каби вазифалар белгилаб қўйилган. Мазкур вазифалар ижроси инсониятга қурғоқчилик ва чўлланиш ижтимоий, иқтисодий зарар келтириши ва дунё миқёсида экологик таҳдид хавфини камайтиришга хизмат қилади.
Дилрабо Бобоева Ўрмон хўжалиги агентлиги ахборот хизмати
