Мутахассисларнинг сўзларига кўра, дарахтлар кўп бўлса чанг- тўзон келиб чиқишини олдини олади. Чунки юзага келган чанг-тўзонни ўсимлик дунёси ҳазм қилиб юборади.
Ўрмон хўжалиги агентлиги масъуллари Шерзод Усмонов ва Фаррух Фазлиев давлат раҳбарининг ташаббуси билан бошланган “Яшил макон” умуммиллий лойиҳаси доирасида Бухоро вилоятида амалга оширилаётган ишлар билан яқиндан танишди. Ташриф давомида кўчат экиш ишларини тизимли равишда тўғри ташкил этиш масалаларига алоҳида эътибор қаратилди. Кўчат экиш ишларини амалга оширишда иқлим ва тупроқ шароитига мос навларни танлаш билан биргаликда агротехника талабларига тўлиқ риоя этилишини таъминлаш, минерал ва маҳаллий ўғитлар билан бойитиб, кўчатлар ўсиб ривожланиши учун тупроққа ишлов беришни тўғри йўлга қўйиш юзасидан аниқ таклиф ва тавсиялар берилди.
Шунингдек, Шерзод Усмонов Қоракўл ўрмон ов хўжалиги ҳамда Қоракўл тажриба станцияси фаолиятини, янги қурилган бино ва иншоатларни ҳолатини ҳам ўрганди. Соҳа мутасаддилари билан ўтказилган учрашувда ўзининг зарурий фикрлари билан ўртоқлашди.
Дилрабо Бобоева Ўрмон хўжалиги агентлиги ахборот хизмати
