Бутун дунёда экологик барқарорликка эришиш, ер юзининг ҳозирги ҳолатини тубдан ўзгартириш учун халқаро ҳамкорлик, экологик қонун талабларини бузганлик учун жавобгарликнинг қатъий бўлиши, аҳолининг юқори даражадаги экологик онг ва маданиятини оширишнинг ўзигина кифоя қилиб қолмасдан, балки барчамизни масъулият ҳисси билан яшашга ундашга ҳам чақиради.
Табиатни муҳофаза қилиш инсониятнинг келажак авлод учун қолдириши мумкин бўлган ягона ва бебаҳо хазинасидир.
Пойтахтимизда Ўзбекистон Республикаси Ўрмон хўжалиги Давлат қўмитаси Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) билан ҳамкорликда “Ўзбекистон тоғ ва водий ҳудудларида ўрмонларни барқарор бошқариш” лойиҳасини мувофиқлаштирувчи қўмитасининг навбатдаги йиғилишини ўтказди.
Қайд этилишича, лойиҳа мувофиқлаштирувчи қўмитаси йиллик иш режаси ва бюджетини кўриб чиқиш ва тасдиқлаш, лойиҳани амалга ошириш жараёни ва эришилган натижалар мониторинги, шунингдек, халқаро ва миллий ҳамкорлар билан ҳамкорликни янада ривожлантириш учун масъул бўлган асосий бошқарув органи ҳисобланади.
Тадбирда таъкидланишича, глобал Экологик Жамғарманинг “Ўзбекистоннинг тоғли ва водий ҳудудларида барқарор ўрмон бошқаруви” лойиҳаси ФАО томонидан Ўзбекистон Республикаси Ўрмон хўжалиги Давлат қўмитаси билан ҳамкорликда амалга оширилмоқда. Лойиҳанинг асосий мақсади барқарор ўрмон бошқарувини ривожлантиришдан иборат бўлиб, бу маҳаллий аҳолига ўрмон ресурсларидан оқилона фойдаланиш, ўрмонларнинг нафақат маҳсулдорлиги, балки уларнинг экологик функцияларини, эстетик ва рекреацион қийматини, биологик хусусиятлари ва ландшафт хилма-хиллигини сақлаб қолиш имконини берадиган ёндашувдан иборатдир.
Бу йўналишда инновациялар, ресурс тежовчи технологияларни жорий этиш, гендер тенглигига алоҳида эътибор қаратган ҳолда маҳаллий аҳолини барқарор ўрмон хўжалигини юритиш жараёнига кенг жалб этиш бўйича ишлар олиб борилмоқда. Лойиҳа доирасида ФАО экспертлари кўмагида Ўзбекистонда ўрмон хўжалигини ривожлантириш, соҳада меҳнат қилаётган хотин-қизларнинг имкониятларини кенгайтиришга қаратилган қатор ҳуқуқий ҳужжатлар ишлаб чиқилди. Шунингдек, лойиҳа амалга оширилган йиллар давомида 620 та маҳаллий аҳоли хонадонларининг ижтимоий аҳволини яхшилашга ҳисса қўшилди.
Айни пайтда лойиҳа мамлакатимиздаги турли ўрмон экотизимларини ифодаловчи 4 та тажриба объектида ишламоқда.
Шунингдек, 2022 йилга мўлжалланган иш режаси ва бюджети кўриб чиқилди.
Жорий йилда лойиҳанинг барча тажриба майдонлари ва 92 та ҳудудий ўрмон хўжалиги ташкилотларини қамраб олган ҳолда бир қанча кенг кўламли тадбирларни амалга оширишни режалаштирганмиз, дейди “Ўзбекистоннинг тоғли ва водий ҳудудларида барқарор ўрмон бошқаруви” лойиҳасининг техник координатори Олимжон Қаҳҳоров.- Лойиҳа доирасида ўтган йили ташкил этилган янги ГИС-лабораторияси ва маълумотлар маркази имкониятлари туфайли биз ўрмон хўжалиги мутахассисларини электрон хариталар яратишга ўргатиш, шунингдек, Ўзбекистондаги 2000 гектар ўрмон майдонларини инвентаризация қилишни режалаштирдик. Бундан ташқари, келгусида республика ўрмон хўжалиги ташкилотлари фаолиятида гендер тенглигини таъминлаш масалаларига бағишланган 4 та конференция ташкил этилади.
Мутахассислар томонидан тақдим этилган маълумотларга кўра, Қашқадарё вилояти Китоб тумани ўрмон хўжалигидаги Минтақавий ўқув ва ахборот-тарғибот маркази фаолияти йўлга қўйилди. У ерда хорижий ўрмон хўжалиги мутахассислари томонидан Ўзбекистоннинг жанубий вилоятларидаги фермерлар, тадбиркорлар ва бошқа манфаатдор шахслар учун дарслар ўтказилади.
Маълумот ўрнида қайд этиш лозимки, ўтган 2021 йилда лойиҳанинг оралиқ баҳолаши ўтказилган.Баҳолаш давомида эришилган натижалар ўрганилди ва лойиҳа фаолияти бўйича кейинги қадамлар белгиланди. Жумладан, гендер масалалари бўйича ишларни кучайтириш, маҳаллий аҳолини ўрмон хўжалиги жараёнларига кенг жалб этишнинг самарали механизмларини яратиш, даромадларини ошириш ва маҳаллий аҳолига мамлакатда етиштирилган маҳсулотларни республика бозорларида сотишда кўмаклашиш бўйича тавсиялар берилди.
Мувофиқлаштирувчи қўмита лойиҳа фаолиятига юқори баҳо берди ва тадбирларни амалга ошириш бўйича кенг кўламли масалаларни инобатга олиб, лойиҳани 2 йилга узайтириш бир овоздан қўллаб-қувватланди. 2022 йил учун лойиҳа иш режаси ва бюджети тасдиқланди.
Ўрмон хўжалиги Давлат қўмитаси Ахборот хизмати бўйича мутахассис Дилрабо Бобоева
